كان عندي بقعه في بنطلون ....البقعة ماكنتش واضحة قوي ..لكنها تأرق نصاعة ورونق البنطلون ..المهم جربت معاها جميع أنواع المساحيق .......كلور مانفعش ..كلور ألوان مانفعش ..جاز مانفعش .....المهم أستسلمت للواقع وتركت البقعه والبنطلون في شأنهما .......وقلت طالما هي مش ظاهرة قوي خلاص ..مافيش مشاكل ........لا أعلم ولكن مع الوقت أحسست أن البقعة والبنطلون أصبحا اصدقاء والبقعة أصبحت علامه مميزه ..أعطت للبنطلون رونق وشكل جديد....................المهم لاأعلم لماذا فكرة البقع دي نطت في دماغي
..خلاني اسأل نفسي سؤال وجيه هو انا عندي بقع ؟
أكيد عندي بقع ...بس هي واضحة ..هل حاولت أشيلها ......فيه بقع بتكون واضحه ولازم تتشال عشان شكلها وحش قوي وفي بقع بتعطي شكل وتعطي شخصيه مستقله .........أكيد البقع دي ماتظهرش للناس التانيين إلا لما يقربوا مننا قوي ..ويتعرفوا علينا عن قرب .......صدقوني ساعات بحاول أزيل البقع دي بس أكتشفت ان البقع دي مش كبيره قوي ومش واضحه بس أصبحت ميزه تخيلو !أصبحت علامه .لا أعلم هل يجب إزالتها ..أم نتركها كما هي .....؟ وهل اذا حبيت شخص يجب ان تخبره بتلك البقع أم تتركها للزمن ويتعرف عليها هو بنفسه
.............................................
لو شخص أتعرفت عليه ..وحبيته سواء كان صديق أو غيره ..هل تصارحه ببقعه أم تتركه
أعتقد لو انت بتحبه تعرفه بقعه اللي ممكن مايكونش شايفه كويس,ولكن إزاي تعرفه ..هل تظهرها له بالإشاره إليها مباشرة
على فكره انت بخيل قوي
أم
على فكره انت من أكرم الأشخاص اللي قابلتهم في حياتي
مع العلم ان الطريقه الأولى ممكن تحرجه ..وتهينه مع انك بتحبه ولكن عامل زي الدبه اللي قتلت صاحبهاو الطريقه التانيه هاتكسفه بالذوق
15 comments:
مش شرط البقع الي انت شايفها بقع يكون الاخر شايفها بقع
الموضوع نسبي لكن الحل هو اعترافك بالبقع و علي الاخر انه يحدد هل هي كذلك ام لا
جميل قوي انك تشبه العيوب بالبقع
بس صدقني محدش يقدر يتخلص من بقعة كبر بيها
لان من شب على شئ شاب عليه
تحياتي
فكرة البقع عجبتني جدا وعجبني اكتر طريقة التفكير التي قادتك لكتابة بوست جميل بالشكل دي
مهم اوي ان كل واحد يفتش ويخلي باله من بقعه اوي حتي لو لم تكن ظاهره لمن حوله وان لم يستطع تغييرها فاكيد لو عينه عليها وحددها هيخفف منها
انا ضد مقولة من شب علي شئ شاب عليه هي صحيحه مع الاشخاص الذين لا يروا بقعهم ولا يريدون ان يروها ولا يقبلون ان يشير لهم بها احد
ان الواحد يدور علي بقعه دي بداية التصحيح
سارة
فعلا ياسارة ساعات فيه بقع انا شايفها الناس مش شايفينها وساعات العكس ..عشان كده انت محتاج لحد قريب قوي يبينهالك
والله ياسمبتيك الموضوع حسب الشخصية وحسب البقعة نفسها
بس اعتقد ساعات الموضوع فعلا بيكون صعب
همسات
شكرا ياهمسات على التعليق الجميل ..ده\
في ناس دماغها بتكون ناشفه ..تجبيها يمين شمال مافيش فايده
عشان كده مهم شخص قريب منك يعرفك عيوبك بهدووووووووء
ماشي ياوليد ....شكرا على التعليق ..لا والله انا اول ماكتبته ماكنتش في دماغي خالص ..بس كان طرح لطريقتين لأزالة البقع
.....................\
لا أملك سوى اني أقول ........مش عارف والله بس ساعات مابقدرش اعبر عن اللي جوايا بسهولة ..وربنا يعلم ماأكنه لك من حب
في حل من اتنين اولا يااما تصبغ البنطلون وده ينهيه بعد قصيرة او حل وزارة الداخلية وتقلع البنطلون اقصد (البقع)
اما انا فبقول الاحسن والاوفر تشترى بنطلون جديد
بصراحه انا اصحابي قوي بقولهم علي الحاجات اللي بتضايقني منهم و احنا متفقين علي كده عشان كل واحد ينبه التاني لكن العيوب مبتبقاش لكل الاشخاص عيوب يعني مثلا ممكن يكون فيه عيب الغيره مثلا يعني في حد يحبه و فيه حد يكرهه
لكن اللي يحب حد مبيبصش لعيوبه ابدا
اكيد حلو
والاحلى اننا نكون مراية للشخص اللى قدامنا خصوصا فعيوبه
يشوفها من خلالنا زى مهى والمرايه مش بتحرج
خالص تحياتى
أدعوكم جميعا للمشاركة فى البلوج بتاعى...موضوع مهم بدأت فيه....و أحتاجكم معى
مش شرط ان البقع كل الناس شايفاها عيب فيك ممكن تكون شايفاها ميزة حتى من غير مايتعودوا عليه بس اعتقد انك ممكن تشوف الناس هي شايفه البقعة دي ولا لأ وتحاول تغير الحقيقه مع رايهم فيك ولازم يكون اللي تسأله يكون واحد فاهم صح لأن البقعه الصعبه مش ممكن تتشال إلا من خبير التنظيف بس المهم انك تحاول تغير اي حاجه فيك واعتقد ان مافيش حاجه اسمها مستحيل حتى لو قعدت تحاول لأخر العمرممكن يكون صعب انك تشيل العيوب عشان انت كبرت عليها بس لازم تحاول اكتر من مره وماتستسلمش
زى ما انت قولك فى بقع بتبقى علامه مميزه او تجمل الشى
طبعا كل الناس فيها بقع ومش ضرورى طول الوقت نحاول نزيل البقع دى
انا عن نفسى عندى بقع كتييييييير بس عمرى ما فكرت اغيرها بالعكس بقول لكل اللى اعرفهم عليه لانها انا
عجبهم اوك مش عجبهم خلاص انا مش هتغير دى انا وبس
لكن عارف اهم حاجه ان البقع دى تكون مش بتضر حد
تانى
البوست حلو اوى بجد
واستمتع بكل ببقعك
كيفك انت
هههههه..تعليقك دمه خفيف واتمنى مايكنش الأخير ان شاء الله
...........
نهر الحب
فعلا اللى يجاملك و يضحك عليكي ده مايكنش صديق ولا صاحب
لأن ممكن يترتب عليها كوارث
ممكن تكون عيب مفهمك ان هو ميزه
..............
free Pharoah
اكيد طبعا بس المشكله هاتلاقي الحد ده فين
شكرا على تعليقك
.............
35l
شكرا على زيارتك
وشوشتي
فعلا ياوشوشتي ...مافيش حاجه اسمها مستحيل ..بس الأهم ان يكون مقتنع ان ده عيب فيه والإقتناع ده هاينتج عنه اصرار لإزالة البقع
.............
دعاء عادل
شكرا يادعاء على تعليقك
الأهم ان انت تكون عارف بقعك والأهم ان تكون مابتضرش حد تاني والا تتطلب ازالتها فورا
Post a Comment